إيلا
سولتي شي مغربي على شي حاجة خفّ من دغيا غادي يكول ليك الروشارج ديال
اتصالات المغرب, لاكارط ديال ماروك تيليكوم فيساع كتسالي , والعجب !!
نورمالمون الدقيقة عندنا فالمغرب ديال الهضرة – يعني حسب ما كيكولو لينا
فالإشهار- كتطلع علينا ب 3 دراهم تقريبا, من لبورطابل لبورطابل , ولكن
إيلا شارجيتي 20 درهم ماروك تيليكوم ما غاداش تكمّل ليك دقيقة وحدة ديال
الهضرة !! يعني الشركة ديال الاتصالات منوضاها تقوليب بالعلالي, والمواطن
كيخلّص و كيكمّدها كيف ديما, لكن الناس شافو هاد الشي ولاغادي و كايكثر,
وولاّو كيتساءلو على الشركة الوطنية لتقنين الاتصال اللي من المفروض أنها
كتراقب هاد الشي أشنو كتدير ؟ وأشنو دورها بالضبط إيلا ما خلاتش التسعيرة
ديال الدقيقة تكون فمستوى دخل المواطن العادي وتكون فعلا التسعيرة
الحقيقية ديال المكالمة ماشي لكدوب كيفما طاري دابا..
المشكل أن شركة ماروك تيليكوم عاوتاني مضوّراها تبزنيس فالمواطنين
المشتركين معاها بلا ميعيقو, هاد الشي كيسمّيوه فالبلدان الغربية بانتهاك
الخصوصية, وفالبلد ديالنا مكيسميوه والو و دايرين عليه عين ميكة, كيفاش
هاد الشي عاوتاني؟ ملي كتكون ناعس فالليل و كيفيقك ميساج فالتيليفون كيكول
ليك تشترك فنادي رياضي قريب ليكوم, و لا فرصة تخفيضات فكيتيا اللي حداكوم,
ولا شي أوطيل قريب ليك داير شي سهرة رخيصة ,هاد الشي مزيان, ولكن شكون
اللي كال لهادوك الناس راك ساكن حداهوم؟ حتى كيسيفطوليك الإشهار نيشان
للبورطابل ديالك عن طريق ماروك تيليكوم؟ القضية نايضة تبزنيس أمعلّم,
فالمواطن و بالمواطن وعلى عينك يا مواطن, و ماشي من أجل المواطن, كيفما
كيكولو فالشّعار.. !!